Mbrëmjen e djeshme lajmi se aktori i njohur Genc Fuga kishte pësuar një goditje në tru dhe se i duheshin 19 mijë euro për operacion, bëri që shumë persona të solidarizoheshin me të dhe shuma e kërkuar për ndërhyrjen kirurgjikale të plotësohej në kohë rekord.
Por duket se problemet ekonomike të aktorit, kanë qenë prej kohësh.
I ftuar në një emision televiziv, Aktori shpjegoi për herë të parë situatën e vështirë ekonomike në të cilën ndodhet së bashku me bashkëshorten e tij, Eni Jani, aktoren me të cilën jemi njohur nëpërmjet serialit ‘Njerëz dhe Fate’.
Biseda:
Ester Bylyku: Cila është prova më e madhe e dashurisë që ti i ke dhënë gruas tënde?
Genc Fuga: Është gati një mision i pamundur që të jesh një çift krijuesish dhe interpretuesish në Shqipëri. Nuk e di si i gjejmë forcat në fund të muajit, që presim daljen e rrogës së radhës.
Ester Bylyku: Cili ka qenë momenti që ajo të ka mbështetur më shumë se kurrë?
Genc Fuga: Unë fsheh paaftësinë time si kryefamiljar në sigurimin e të ardhurave. Eni duhet të fshehë pasigurinë time në sy të vajzave dhe pjesës tjetër të familjes. Është një sakrificë, është një rol mbi rol që duhet të luajmë çdo fund muaji.
